Fyrir skemmstu áttu meðlimir No Borders í Reykjavík fund með Starfshópi innanríkisráðuneytisins um málefni útlendinga utan EES. Á þeim fundi lögðu samtökin fram eftirfarandi kröfur:
1. Að Ísland leggi tafarlaust niður landamæragæslu og vegabréfaeftirlit einhliða. Þær stofnanir sem nú sinna landamæragæslu verði leystar af hólmi með stofnununum sem sinna aðstoð við flóttamenn og innflytjendur. Að sú ákvörðun verði kynnt með stolti á alþjóðlegum vettvangi.
2. Verði ekki samþykkt að leggja niður landamæragæslu krefjast No Borders til vara:
2.1. Að sett verði á fót stofnun eða stofnanir sem hafa það hlutverk eitt að sinna aðstoð við innflytjendur og aðra aðkomna.
2.2. Að flóttafólki verði gert kleift að hafa aðsetur í Reykjavík eða hvar sem það kýs, líka á meðan mál þeirra eru skoðuð og staða þeirra óákveðin, og njóti sama stuðnings og réttinda og nú er veittur þeim sem hafa aðsetur í Reykjanesbæ. Sú staðreynd að ekki hafi verið sett reglugerð um réttindi hælisleitenda eins og 47. gr. útlendingalaga kveður á um er vítaverð vanræksla af hálfu yfirvalda.
2.3. Að heimildir í lögum og reglum um hælis- og dvalarleyfisveitingar verði túlkaðar vítt en heimildir til brottvísunar og frelsissviptingar verði túlkaðar þröngt.
2.4. Að fullgiltur verði, og síðan löggiltur og framkvæmdur á skilvirkan hátt, Samningur Sameinuðu þjóðanna um réttindi farandlaunþega (e. International Convention on the Protection of the Rights of All Migrant Workers and Members of Their Families). Einnig að fullgiltur verði samningur Sameinuðu þjóðanna um ríkisfangslausa.
2.5. Að ríkisvaldið standi að stofnun sendiráðs landlausra sem skuli annast hagsmunagæslu fyrir ríkisfangslausa og þá sem sem óttast stjórnvöld í heimalandi sínu eða treysta þeim ekki til þess að vernda sig gegn ofsóknum, morðtilraunum, pyntingum eða annarri vanvirðandi meðferð.
3.1. Að stofnuð verði sannleiksnefnd um mismunun á grundvelli þjóðernis, trúarbragða og kynþáttar sem verði falið að rannsaka stofnanabundinn rasisma á íslandi og alla ólöglega aðför ríkisvaldsins að réttindum innflytjenda og flóttamanna. Nefndinni verði falið að annast ákærur í ljósi þeirra gagna sem hún aflar. Hún fái ríkulega úthlutun úr fjárlögum og hafi sömu heimildir til húsleita, yfirheyrslna og valdbeitingar og embætti sérstaks saksóknara.
3.2. Verði ekki orðið við tillögu 3.1. krefjast No Borders samtökin þess að innanríkisráðuneytið ráðist í gagngera úttekt á starfsemi Útlendingastofnunar (ÚTL), geri ýtarlega úttekt á fasískum vinnubrögðum, fúski og losarahætti og ráðist í ákærur og umbætur á grundvelli þeirra gagna sem það aflar. Öllu starfsfólki ÚTL, ráðuneyta, lögreglunnar, félagsþjónustunnar og annarra stofnanna sem koma að málaflokknum, sem hefur orðið uppvíst að rasisma í starfi eða öðrum brotum á mannréttindalöggjöf og stjórnsýslulögum verði vikið úr starfi og eftiratvikum refsað.
4.1. Að ríkisvaldið sjái til þess að dómskerfið verði opnað fyrir almenningi óháð ríkisfangi eða stöðu að öðru leyti með stofnun ókeypis lögfræðiþjónustu. Þetta er afar hógvær krafa í ljósi þess varnarleysis aðkominna gagnvart dómskerfinu sem No Borders hafa orðið vitni að. Við teljum gjafsóknarákvæði í lögum um rekstur einkamála ekki uppfylla sjálfsagða kröfu um opinn aðgang almennings að lögfræðiþjónustu og þar með dómskerfinu.
4.2. Verði ekki orðið við tillögu 4.1. á næstunni gerum við til vara kröfu um að ríkið kosti fleiri klukkustundir með lögfræðingi fyrir hvern flóttamann og að No Borders og öðrum mannréttindasamtökum verði gert kleift að fara með flóttamönnum í skýrslutökur, yfirheyrslur sem stuðningsaðilar, óski flóttamennirnir þess.
4.3. Að auki gerum við kröfu um að fá tilkynningar um vistun flóttamanna og annarra útlendinga í fangelsum og að þeim verði boðið að haft verði samband við No Borders.
4.4. Að gripið verði umsvifalaust til aðgerða sem stytta málsmeðferð stjórnvalda í málum flóttamanna og annarra útlendinga sem sækja um dvalar- eða atvinnuleyfi á Íslandi.
4.5. Að hælisleitendur eigi fullan rétt á endurgjaldslausri heilbrigðisþjónustu, þ.á.m. sálfræði- og geðlæknaaðstoð, á meðan málsmeðferð þeirra er yfirstandandi.
5.1. Að öllum flóttamönnum sem hafa hlotið dóma á grundvelli falsaðra vegabréfa verði veitt uppreins æra. Að öllum föngum sem afplána slíka dóma verði sleppt tafarlaust. Saksóknarar, dómarar og eftir atvikum verjendur í slíkum málum verði kallaðir fyrir sannleiksnefnd um mismunun á grundvelli þjóðernis og kynþáttar. Þeim flóttamönnum sem þegar hafa setið af sér slíka dóma verði greiddar skaðabætur.
5.2. No Borders gera þá sjálfsögu kröfu að héðan af hætti ríkið að brjóta á mannréttindum flóttamanna með þessum hætti og engir fleiri verði ákærðir fyrir það að nýta þann rétt sinn að flýja þrátt fyrir vegabréfsleysi.
No Borders í Reykjavík
